काही कर्मचाऱ्यांवर गुन्हे दाखल… पण “मुख्य सूत्रधारांना का अभय?” — परेश उदेवाल यांचा संतप्त सवाल!

अमळनेर शहराला हादरवून टाकणाऱ्या गांधली जलशुद्धीकरण केंद्रातील अवैध नळ जोडणी आणि पाणी चोरी प्रकरणाने आता गंभीर वळण घेतले आहे. अनेक दिवसांपासून तक्रारी, निवेदने, अल्टिमेटम आणि आंदोलनाच्या इशाऱ्यांकडे दुर्लक्ष करणारे प्रशासन अखेर “अन्न त्याग आमरण उपोषणा”च्या दबावाखाली हलले असून, अमळनेर पोलीस ठाण्यात गुन्हे दाखल करण्यात आले आहेत.

मात्र, या कारवाईत फक्त काही कर्मचारी आणि प्लंबर यांनाच लक्ष्य करण्यात आले असून, संपूर्ण रॅकेटचे “मुख्य सूत्रधार” अद्याप मोकाट फिरत असल्याचा गंभीर आरोप आंदोलनकर्ते परेश उदेवाल यांनी केला आहे.

🔴 नेमकं प्रकरण काय?

दि. ६ एप्रिल २०२६ रोजी गांधली जलशुद्धीकरण केंद्र आणि पंप हाऊस येथे कोणतीही अधिकृत परवानगी, मंजुरी किंवा पावती नसताना मुख्य आउटलेट पाईपलाईनला थेट १ इंची अवैध नळ जोडणी करण्यात आल्याचा धक्कादायक प्रकार समोर आला.

या प्रकारामुळे केवळ पाणी चोरीच नव्हे, तर शासकीय मालमत्तेचे नुकसानही झाल्याचा आरोप आहे. नगरपरिषदेच्या चौकशीत खाजगी प्लंबर जावेद कमरुद्दीन शेख आणि न.पा. कर्मचारी कमरोद्दीन शेख हुसेन यांचा सहभाग स्पष्ट झाल्याचे समोर आले.

मुख्याधिकारी श्री. गणेश शिंदे यांच्या आदेशानुसार पाणी पुरवठा विभागाचे सुपरवायझर बारकु कृष्णा सोनवणे यांनी अमळनेर पोलीस ठाण्यात अधिकृत फिर्याद दाखल केली.

⚠️ “आरोपींना पाठीशी घालणाऱ्यांवरही गुन्हा!”

या संपूर्ण प्रकरणातील सर्वात धक्कादायक बाब म्हणजे, गांधली पंप हाऊसवरील सुपरव्हिजनचे काम पाहणारे कर्मचारी राजेंद्र काशिनाथ हडपे यांनी कथितपणे आरोपींना वाचवण्याचा प्रयत्न केल्याचा आरोप आहे.

वरिष्ठ अधिकाऱ्यांनी स्पष्ट आदेश देऊनही त्यांनी फौजदारी गुन्हा दाखल करण्यास नकार दिल्याने अखेर त्यांच्यावरही भा.न्या.संहिता २०२३ च्या कलम २२३ अंतर्गत गुन्हा दाखल करण्यात आला आहे.

सध्या या संपूर्ण प्रकरणाचा तपास पोलीस हेडकॉन्स्टेबल गणेश पाटील करत आहेत.

🔥 “मुख्य सूत्रधारांना अटक झाल्याशिवाय मागे हटणार नाही!” परेश उदेवाल

प्रकरणात काही गुन्हे दाखल झाल्यानंतरही आंदोलनकर्ते परेश उदेवाल यांनी प्रशासनावर जोरदार हल्लाबोल केला आहे. त्यांच्या मते, ही कारवाई म्हणजे जनतेचा रोष शांत करण्यासाठी केलेली “तात्पुरती मलमपट्टी” आहे.

“जोपर्यंत या घोटाळ्यामागील मुख्य सूत्रधारांना बेड्या ठोकल्या जात नाहीत, तोपर्यंत आमचं आंदोलन थांबणार नाही. पाणी हा जनतेचा हक्क आहे, कोणाच्या बापाची जहागीर नाही! लहान कर्मचाऱ्यांवर कारवाई करून मोठ्या मास्यांना वाचवण्याचा खेळ आम्ही चालू देणार नाही.”
— परेश उदेवाल (आंदोलनकर्ते)

🚨 अमळनेरमध्ये संतापाची लाट!

या प्रकरणामुळे अमळनेर शहरात संतापाचे वातावरण निर्माण झाले असून, “पाणी चोरीच्या रॅकेटमागे नेमके कोण?” हा प्रश्न आता सर्वसामान्य नागरिक विचारू लागले आहेत.

प्रशासनावर राजकीय दबाव आहे का?
मुख्य सूत्रधारांना संरक्षण कोण देत आहे?
आणखी कोणकोण या घोटाळ्यात सहभागी आहेत?

असे एक ना अनेक सवाल आता शहरभर चर्चिले जात आहेत.

 “आरपारची लढाई सुरू!”

आंदोलनकर्ते परेश उदेवाल यांनी स्पष्ट इशारा दिला आहे की,

मुख्य दोषींवर कठोर कायदेशीर कारवाई आणि अटक होत नाही तोपर्यंत उपोषण मागे घेतले जाणार नाही.

अमळनेरमध्ये आता या आंदोलनाची, प्रशासनाच्या भूमिकेची आणि पाणी चोरी प्रकरणातील “मोठ्या नावांची” जोरदार चर्चा रंगू लागली असून, पुढील काही दिवसांत हे प्रकरण आणखी पेटण्याची शक्यता व्यक्त केली जात आहे.