🟢 अंबा ऋषी टेकडी फिल्टर प्लांटवरील क्लोरीन गॅस गळती नियंत्रणात; नागरिकांनी अफवांवर विश्वास ठेवू नये!

महाराष्ट्र जनमत न्यूज

अंबा ऋषी टेकडी येथील पाणीपुरवठा विभागाच्या फिल्टर प्लांटवर आज दुपारच्या सुमारास क्लोरीन गॅसची किरकोळ गळती झाल्याची घटना घडली. मात्र, फिल्टर इन्स्पेक्टर गणेश शिंगारे यांनी प्रसंगावधान राखत तातडीने योग्य उपाययोजना केल्यामुळे काही तासांतच परिस्थिती पूर्णपणे नियंत्रणात आणण्यात आली.

घटनेची माहिती मिळताच माननीय मुख्याधिकारी गणेश शिंदे साहेब यांनी संपूर्ण परिस्थितीवर बारकाईने लक्ष ठेवून आवश्यक सूचना दिल्या. तसेच पाणीपुरवठा अभियंता सत्यम पाटील, साहेब पाणीपुरवठा सभापती कैलास पाटील तात्या साहेब आणि नगरसेवक पंकज भाऊ चौधरी यांनी घटनास्थळी भेट देऊन परिस्थितीची प्रत्यक्ष पाहणी केली व सर्व बाबींचा आढावा घेतला.

सध्या फिल्टर प्लांट परिसरातील परिस्थिती पूर्णपणे नियंत्रणात असून कोणताही धोका नसल्याचे प्रशासनाकडून स्पष्ट करण्यात आले आहे. त्यामुळे अंबा ऋषी टेकडी परिसरात जाण्यास किंवा फिरण्यास नागरिकांनी घाबरण्याचे कारण नसल्याचे सांगण्यात आले आहे.

प्रशासनाने नागरिकांना आवाहन केले आहे की, सोशल मीडियावर पसरवल्या जाणाऱ्या अफवा किंवा अप्रमाणित माहितीवर विश्वास ठेवू नये. कोणतीही माहिती अधिकृत स्रोतांकडूनच घ्यावी. प्रशासन परिस्थितीवर सतत लक्ष ठेवून असून नागरिकांच्या सुरक्षिततेला सर्वोच्च प्राधान्य दिले जात आहे.