🚨 अखेर सामाजिक कार्यकर्ते परेश उदेवाल मैदानात! कचऱ्याच्या गाडीतून मृतदेह वाहतूक प्रकरण दोषींवर कारवाईची ठाम मागणी

महाराष्ट्र जनमत न्यूज

अमळनेर शहरात घडलेल्या कचऱ्याच्या घंटागाडीतून बेवारस मृतदेहाची वाहतूक प्रकरणी आता सामाजिक कार्यकर्ते परेश रवींद्र उदेवाल आक्रमक झाले आहेत. त्यांनी अमळनेर नगर परिषदेकडे अधिकृत तक्रार अर्ज दाखल करून संबंधित अधिकारी, कर्मचारी आणि कचरा संकलन ठेकेदारावर कठोर कायदेशीर व प्रशासकीय कारवाईची मागणी केली आहे.

परेश उदेवाल यांनी आपल्या तक्रारीत म्हटले आहे की, मृत व्यक्ती कोणत्याही परिस्थितीत असो, त्याच्या मृतदेहाचा सन्मान राखणे ही प्रशासनाची नैतिक व कायदेशीर जबाबदारी आहे. मात्र कचरा वाहून नेणाऱ्या वाहनातून मृतदेहाची वाहतूक झाल्याचा आरोप अत्यंत गंभीर असून, यामुळे अमळनेरची प्रतिमा राज्यभर मलिन झाली आहे.

या प्रकरणात संबंधित अधिकारी, कर्मचारी आणि ठेकेदार यांच्या भूमिकेची उच्चस्तरीय, निष्पक्ष चौकशी करून दोषींवर कठोर कारवाई करण्यात यावी, तसेच भविष्यात अशी अमानवीय घटना पुन्हा घडू नये यासाठी ठोस उपाययोजना कराव्यात, अशी मागणी त्यांनी केली आहे.

“बेवारस म्हणजे कचरा नाही… तोही एक माणूस होता!”

परेश उदेवाल यांनी स्पष्ट शब्दांत म्हटले आहे की, “मृतदेहाची विटंबना हा केवळ एका व्यक्तीचा नव्हे, तर संपूर्ण मानवतेचा अपमान आहे. दोषींना वाचवण्याचा कोणताही प्रयत्न झाला, तर नागरिकांच्या सहभागाने तीव्र लोकआंदोलन उभारले जाईल.”

या प्रकरणामुळे शहरात संतापाचे वातावरण निर्माण झाले असून आता सर्वांचे लक्ष नगर परिषद प्रशासनाच्या पुढील भूमिकेकडे लागले आहे. तक्रारीनंतर दोषींवर कठोर कारवाई होणार की प्रकरण दडपले जाणार, याची उत्सुकता नागरिकांना लागली आहे.